Pole Fitness: Eitthvað nýtt, eitthvað skemmtilegt, eitthvað spennandi...

Fyrir rúmum 4 árum síðan flutti ég til Reykjavíkur frá Bifröst, komin með passlega nóg af hlaupabretti og handlóðum en langaði að finna mér einhverja nýja hreyfingu til að iðka.

Eitthvert kvöldið sat ég fyrir framan sjónvarpið og rak þá augun í þátt þar sem verið var að kynna Pole fitness í Magadanshúsinu. Af eintómri forvitni ákvað ég að google og fann námskeið í Heilsuakademíunni. Ég sendi póst og spurði hvenær næsta byrjendanámskeið byrjaði en þá var um að ræða 12 vikna námskeið. Fljótlega fékk ég svör um að ég skyldi bara koma inn í það námskeið sem væri byrjað en þá voru 4 vikur búnar af því.

Fyrstu 2 vikurnar voru geggjaðar svo fóru trikkin að vera heldur erfið fyrir mig og eftir 5 vikur fannst mér framfarirnar engar. Ég þrjóskaðist þó áfram og fyrr en varði var ég aftur farin að geta nýja og nýja hluti á hverri æfingu.

Early days - 2010

Hobbýmyndatökutími - 2011

Gay Pride 2011

Árið 2012 færði ég mig yfir í Pole Sport og hef verið þar síðan. Eftir rúm 4 ár af súluhangsi er ég hvergi nærri leið auk þess sem ég hef verið að æfa með sumum stelpunum í hópnum mínum í rúm þrjú ár.

Ég hef einu sinni tekið mér hlé í 2 mánuði en skellti mér í staðinn á Lyra lofthringjanámskeið á sama stað - sem er líka verulega gaman. Hér má sjá smá brot af tveggja manna Lyra æfingum:

Síðastliðna 6 mánuði hef ég verið að aðstoðarþjálfa hjá Pole Sport en eftir rúma viku tek ég skrefið inn í þjálfarastarfið og tek við mínum eigin tímum. Ég er mjög spennt fyrir þessu! Í ágúst klára ég síðan réttindin mín og get hengt upp tvö stykki af réttindum á vegginn í Pole Sport, sem býr nú þegar yfir svo mörgum öflugum þjálfurum með allskonar réttindi (yoga, Fit pilates, Lyra, Pole fitness, Einkaþjálfara, zumba og fleira og fleira).

Í Pole Fit hef ég kynnst gífurlega ólíkum persónuleikum með gífurlega ólíka styrkleika. Pole Fitness líkist fimleikum að mörgu leyti og ekki síst vegna þess að hér er um að ræða alhliða líkamsþjálfun. Við erum með æfingar sem krefjast liðleika, jafnvægi, dans og styrkleika. Fæstir hafa þetta allt í byrjun - og sumir ekki neitt... með tímanum kemur þetta allt saman en það er hætt við því að þau trikk sem manni þykja auðveldari verði uppáhalds. Ég er örlítill api þegar kemur að því að uppáhaldið mitt eru yfirleitt styrkleikaæfingar og grófari hreyfingar. Enda smá brussa að eðlisfari kannski.

Halloween 2012

Þegar ég segi fólki frá því að ég æfi Pole Fitness fæ ég mjög oft að heyra "já, mig hefur alltaf langað að prófa það... en ég gæti það aldrei, er þetta ekki ógeðslega erfitt?". Það er enginn að mæta í fyrsta tíma og henda sér á hvolf inn í hvert trikkið á fætur öðru... öll byrjum við einhversstaðar, alveg eins og á fyrstu fótboltaæfingunni þar sem við vorum ekki látin gera hjólhestaspyrnu, fyrstu fimleikaæfingunni sem byrjaði ekki með heljarstökki á trampólíni eða fyrstu boxæfingunni þar sem við vorum ekki send í bardaga. Þetta byrjar allt á sama stað og í danstíma hjá Loga í gamla daga.... með einu góðu hliðar saman hliðar. Hræðslan við að mæta og geta ekki er algjörlega óþörf, byrjendanámskeið eru til þess að taka á móti byrjendum... fólki sem ákvað að skella sér og veit ekkert útí hvað það er að fara. Fyrsti tíminn er ekki eins vandræðalegur og flestir sjá fyrir sér.

Myndataka hjá Aldísi nóvember 2011

Fyrir áhugasama eru skráningar í gangi fyrir næsta námskeið sem byrjar 23. júní á polesport.is. Fyrir áhugasama og aðra unnendur íþróttarinnar þá er innanhúskeppni á laugardaginn næstkomandi, 14. júní, þar sem iðkendur alveg frá byrjendum og upp í þjálfaraflokk hafa sjálfir sett saman rútínur og keppa innbyrðis. Þessar keppnir eru alltaf stórglæsilegar og nemendur leggja allt sitt í að gera sitt atriði glæsilegt. Keppnin byrjar kl. 17 (húsið opnar kl. 16:30) og aðgangur er ókeypis. Ég mæli með því að skella sér - þið verðið ekki svikin. Hér kemur eitt atriði frá síðustu jólasýningu:

Fyrir mig eru æfingar hjá Pole Sport ekki síður félagslegs eðlis. Ég hef, eins og áður segir, æft lengi með mörgum úr hópnum mínum og með hverju árinu verður skemmtilegt að taka þátt í viðburðum með þeim... enda alltaf að kynnast betur. Innanhúskeppnir, Workshop, uppskeruhátíðir, sýningar, Gay pride, Menningarnótt og svo framvegis - þetta eru atriðin sem gera þetta allt saman svo skemmtilegt... og öðruvísi.

Uppskeruhátíð 2013 - Fimm stjörnu hópurinn

Þessi færsla hefur gert nákvæmlega það sem henni var ætlað - sparka í rassinn á mér! Metnaðurinn er í hámarki núna!

Sjáumst í Pole Sport, smiðjuvegi 72!

"Gamlar vörur daglega"

Haustönnina 2005 var ég í lýðháskóla á Fjóni í Danmörku. Í skólanum mínum voru 4 þemapartý yfir önnina og slíkt getur valdið örlitlum höfuðverk fyrir erlenda nemendur sem hafa afar takmarkað af fatnaði meðferðis. Undir nákvæmlega slíkum kringumstæðum kynntist ég fyrst Rauða kross fatabúðunum í Danmörku. Þangað gátum við farið og fatað okkur algjörlega upp fyrir þemapartýin fyrir 1000-2000 íslenskar krónur.
Þegar ég kom heim kíkti ég nokkrum sinnum í Rauða kross búðina hér heima og þótti hún heldur dýr í samanburðinum svo gaf ég henni einhverra hluta vegna aldrei aftur séns.

Í morgun ákváðum við Sindri síðan að kíkja þangað af hans frumkvæði. Ég endaði á að versla þar fyrir 7.200 kr. - fjórar vörur sem kostuðu 1.800 kr. hver. Í dag finnst mér það ekki mikill peningur fyrir þessar vörur og ekki er verra að leggja góðu málefni lið um leið og maður sækir sér eitthvað "nýtt" í fataskápinn.

Mig hefur lengi langað að eiga einhvern lítinn loðkraga til að smella á mig, sérstaklega yfir veturinn. Þeir sem ég hef fundið og litist á hafa yfirleitt kostað of mikið. Ég var því mjög ánægð að finna þennan fyrir 1800 kr.

Annað fallegt um hálsinn var þessi klútur. Ég er almennt ekki mikið fyrir klúta og kaupi þá mjög sjaldan. Held ég hafi keypt 5 um ævina.... og notað 2 af einhverri alvöru. Þessi hentar mér mjög vel, víður og hringlaga með fallegu skrauti.

Ég fann þessa rauðu, fínu skó... konan í búðinni sagðist vera svo glöð að loksins væri einhver kominn sem passaði í þá. Þetta var pínulítið eins og í Öskubusku. Reyndar ekkert svo líkt því en samt smá. Skórnir eru samt ekki úr gleri.

Síðast en þó ekki síst fann ég þessa stórskemmtilegu myntugrænu og hvítu peysu. Hún er frekar mikið þung og maður lítur pínulítið út eins og snjóbolti í henni en fyrst og fremst er hún sjúklega kósý.

Sindri fann sér sólgleraugu, skyrtur og peysu svo það má segja að þetta litla innlit hafi orðið að alvöru verslunarferð. Eitt er allavega víst, Rauða kross fatabúðin hefur fengið annan séns hjá mér. Ég hlakka strax til að sjá hvað bíður mín næst þegar ég rek nefið þar inn, enda um að ræða "gamlar vörur daglega" þar á bæ. :)

Tíundi dagur jóla

Það eru ennþá jól og mjög mikilvægt að halda áfram að gera vel við sig. Kannski ekki mjög mikilvægt, en engu að síður gott fyrir sálina.
Í gær bauð ég góðri vinkonu sem ég hitti alltof sjaldan í mat til mín og við áttum ákaflega huggulegt kvöld enda frá nógu að segja eftir langan tíma.

Að sjálfsögðu var öllu til skartað, enda jólin.

Ég vildi elda eitthvað girnilegt sem við gætum sötrað hvítvín með. Það þurfti einnig að vera mjög einfalt því ég hafði bara rétt um hálftíma til að elda. Klassísk ítölsk pizza varð því fyrir valinu, reyndar með fínum botni þar sem gróft var ekki í boði í Melabúðinni í þetta sinn. Að sjálfsögðu var hún borin fram með heimagerðri hvítlauksolíu... og étin upp til agna.

Með pizzunni drukkum við síðan sætasta hvítvín sem ég hef smakkað úr fallegu spariglösunum frá Ittala. 

Síðast en ekki síst dró ég fram jólaservíetturnar mínar frá Reykjavík Letterpress. Þær fann ég í Kokku fyrir rúmu ári síðan þegar ég fór þangað að skipta einni jólagjöf. Tók þessar servíettur í staðinn og pakkaði strax niður með jólaskrautinu. Það gladdi mig síðan alveg ótrúlega mikið í byrjun desember þegar ég mundi eftir því að ég ætti þær. Í einum pakka eru 20 servíettur, engin eins og allar prýða þær setningu úr frægum jólalögum.

Þegar kjaftakvöldinu lauk ákvað ég að hafa smá dekurstund. Naglalakkaði mig, bæði fingur og tær, auk þess að bera á mig fótakrem og handáburð sem ég fékk frá mágkonu minni og hennar manni í jólagjöf. Hún er snyrtifræðingur og því treysti ég því fullkomlega að hér sé um gæðavöru að ræða þó ég sé langt frá því að hafa vit á því. 

Nýja L'oreal naglalakkið mitt. Það er aðeins meira út í appeslínugult heldur en sést á þessari mynd. Liturinn á myndinni fyrir neðan er nær því að vera réttur. 

Kremin góðu.

Í kvöld fer ég síðan í tímamótapartý hjá annari góðri vinkonu, sú verður þrítug og flytur tímabundið til London á morgun vegna vinnu. Nú er því tækifæri til þess að skvísa sig aðeins upp og súpa á nokkrum kokteilum. Njótið helgarinnar! 

Sushi og vín

Ég hef aldrei kunnað að drekka vín með neinu og alltaf metið gæðin útfrá hversu svalandi það er að drekka þau ein og sér. Ótal sinnum hef ég þó drukkið rauðvín með kjöti og hvítvín með kjúklingi og fiski en hingað til aðeins dæmt vínið af því hversu lítið vont er að nota það til að bleyta upp í bitanum sem ég er að tyggja.

Ég hef heldur aldrei lært að drekka neitt annað en vatn með sushi. Sushi er eitthvað það albesta sem ég fæ og hingað til hefur mér þótt drykkir eyðileggja bragðið af bitunum, sérstaklega þar sem ég hef verið að nota drykkina til að bleyta upp í bitunum eins og með annan mat. Að þessu öllu sögðu drekk ég líka fáránlega lítinn vökva almennt með mat. Betra að drekka bara hratt á eftir.

Þann 25. apríl síðastliðinn fór ég á fyrsta vínsmökkunarnámskeiðið mitt ásamt Sindra en ég ákvað að skella mér eftir að hafa séð það auglýst á innrivef vinnustaðar míns. Þar sem sushi er í miklu uppáhaldi hjá okkur báðum var ekki verra að byrja sinn vínsmökkunarferil á námskeiðinu "sushi og vín". Námskeiðið var haldið í ostabúðinni á Skólavörðustíg og var á vegum vínskólans og SuZushii (Kringlan). Kennari kvöldsins var Dominique en á hana er hægt að hlusta endalaust tala um vín svo mikil er þekking hennar á þeim efnum. Hún hefur einnig verið fararstjóri í ferðum Vínskólans.

Á rúmlega tveimur tímum fræddumst við um þrúgur, lönd og sushi ásamt því að smakka á 5 tegundum af víni með 5 ólíkum sushi bitum.

stolin mynd fundin á google:)

Fyrst fengum við lítinn gúrku maki bita með Santero Prosecco Craze freyðivíni frá Ítalíu. Freyðivínið og bitann hafði ég smakkað áður, en ekki saman. Þarna við fyrstu smökkun kvöldsins áttaði ég mig á villunni sem fólst í því að drekka vínið ofan í matinn. Þess í stað gerði ég eins og kennarinn sagði mér, lyktaði, sullaði, tók sopa og smakkaði. Síðan setti ég sushi bitann upp í mig og áttaði mig í fyrsta sinn á því hvað vín gæti gert fyrir mat. Þetta var skemmtileg blanda, en langt frá því að vera mín uppáhalds þetta kvöldið.

Í annari umferð fengum við laxa nigiri (kodda) með Willm Riesling víni frá Alsace. Vínið eitt og sér fannst mér örlítið sérstakt en gott. Þetta var hins vegar að mínu mati besta samsetningin sem við fengum þetta kvöld. Vínið vinnur sérstaklega vel með feitum fiski.

Í þriðju umferð fengum við California rúllu með Rapitala Cataratto-Chard frá Sikiley. Sushibitinn var rosalega góður enda sushimeistari SuZushii lærður úti í Japan og allt. Vínið var þéttara, gulara og mýkra en það sem við höfðum smakkað í fyrri umferðum.

Í fjórðu umferð fengum við manhattan maki rúllu sem ég hafði ekki smakkað áður. Fyllingin þar er ommeletta, reykt bleikja og kál. Vínið með henni var Altano (Paul Symington) frá Portúgal, þurrt ávaxtavín. Ég var ekkert sérstaklega hrifin af þessari samsetningu.

Fimmti og síðasti bitinn sem við fengum var nauta teriyaki nigiri (koddi) með Pinot Gris Kientz. Ég hlakkaði mikið til að smakka þennan sushi bita þar sem ég hafði aldrei smakkað neitt þessu líkt áður. Hann var mjög góður og það var vínið líka. Að mínu mati var þetta besta vínið á námskeiðinu til þess að drekka eitt og sér en samsetningin var ekki eins góð og sú sem við fengum í annari umferðinni. Vínið er mjög ferskt og má einnig drekka með kjöti sem er ekki alveg rautt en ekki ljóst eins og kjúklingur, til dæmis önd. Eins benti Dominique á að þetta vín væri gott að bera fram með léttreyktur hamborgarhrygg.

Ég mæli með því að fólk prófi að mæta á vínsmökkunarnámskeið hjá vínskólanum, það er ekki svo dýrt og getur orðið mjög skemmtileg kvöldstund :) Við Sindri enduðum síðan kvöldið á Bæjarins bestu þar sem námskeiðið var haldið á kvöldmatartíma og í boði voru 5 sushibitar eða einn fyrir hverja umferð. Það var ekki alveg nógu mikill matur fyrir okkur svo við bættum við smá eftirrétt. 

Ég mæli líka með því að fólk kíki inn á nýju síðuna sem Sindri var að opna matviss.blog.com en þar má finna uppskriftir, fræðslu og umræðu um mat. Hann startaði síðunni bara í gær og er búinn að setja nokkrar skemmtilegar færslur inn nú þegar. Getið líka farið á http://www.facebook.com/Matviss og smellt einu like-i til að fylgjast betur með því sem fer þangað inn. 

Vikur 27-30 2011: Júlí uppgjör

Það gerist nú ekki oft þessa dagana að húsið fyllist af gestum. Það er hins vegar svoleiðis núna, en þar sem báðir gestirnir tilheyra Sindra, annar þeirra er í Fifa 12 og hinn að fylla flakkarann sinn af efni, þá er um að gera að blogga. Það er kannski heldur ekki seinna vænna þegar maður er kominn 3 mánuði á eftir áætlun í bloggi.
Júlí var fínn, einkenndist af tveimur góðum austurferðum þar sem mestum tíma var eytt á Borgarfirði eystri.

1. Vigtin
27. vika: -400 gr.
28. vika: +200 gr.
29. vika: N/A
30. vika: +500 gr.

Þetta gekk semsagt allt í öfuga átt í júlí og ég þyngdist um 300 gr. yfir mánuðinn. Eins og sést gengur þetta allt saman mjög hratt og örugglega :)

2. Sparnaður - eftir áætlun

3. Dáið

4. Nýtt mánaðarins

Vika 27:
Sumarfrí. Í fyrsta skipti á ævinni átti ég inni fullt sumarfrí og fór í rúmar 2 vikur í langþráð frí. Það átti að fara í það að skrifa mastersritgerð en það varð því miður ekki raunin, þá væri ég kannski búin að skila henni núna :)

Vika 28:
Gæsunarfundur. Þar sem fyrsta vinkonubrúðkaupið sem ég hef farið í var í sumar þá þurfti að sjálfsögðu líka að gæsa vinkonu í fyrsta skipti. Það átti hins vegar eftir að gerast seinna í mánuðinum. Í þessari viku fó rég hins vegar í fyrsta skipti á gæsunarfund þar sem ákveðið var hver fyrstu skrefin yrðu í að útbúa góða gæsun fyrir Hjördísi Mörtu.

Hárið í Hörpunni. Við Sindri skelltum okkur á Hárið í Hörpunni sem var vægast sagt æðislegt. Þrátt fyrir að hafa séð þennan söngleik ansi oft og veit nákvæmlega hvað gerist í honum þarf ég alltaf að berjast við tárin í lokasenunum. Það var líka unaður að hlusta á svona marga góða söngvara flytja lögin. En það er víst erfitt að mæla með þessu núna.

Vika 29: 

Ég í klippileik. Sindri plataði mig í að klippa sig. Ég ætlaði nú aldrei að þora því enda ávallt átt erfitt með að teikna tvær jafnar línur hvað þá meira. En ég dembi mér í þetta verkefni á endanum eftir að hann sagði að við gætum bara rakað allt hárið af ef ég myndi klúðra þessu. Þetta varð árangurinn.

Gæsun. Þá var komið að því að gæsa Hjördísi Mörtu. Dagurinn byrjaði á því að hún hélt hún væri að fara í afmælismat með Katrínu Huld á Nielsen en hún átti afmæli þennan dag. Áður en hún náði hins vegar að panta kom maður með ógeðslega grímu, rétti henni poka með búning, langloku og gosflösku ásamt miða þar sem henni var skipað að klæða sig í búninginn og koma með manninum. Gæsinni leist nú ekki sérlega vel á það. Hann teymdi hana síðan á hesti frá Nielsen að sundlauginni á Egilsstöðum þar sem restin af okkur stelpunum beið. Þar var kynnt fyrir henni stigakeppni dagsins en hún gat náð stigum á margan hátt, allt skv. masterplan excel skjali sem ég hafði útbúið með litaþema og prentað út í svarthvítu :) Hún gat einnig fengið refsistig, m.a. fyrir að prumpa. Seinni partinn var síðan farið út í Fljótsbakka þar sem við grilluðum, gáfum gæsinni hentugar gjafir fyrir hjónabandið, borðuðum typpaköku og drukkum vín.

Tjald og úlpa. Við Sindri skruppum líka í Ellingsen fyrir Bræðsluna sem var hjá þessa vikuna og fjárfestum í góðu tjaldi. Ég var reyndar svo heppinn að hitta líka á svaka útsölu á úlpum og fjárfesti í einni fyrir veturinn. Ég hins vegar notaði hana lítið á Bræðslunni þar sem ég vildi ekki stinga í stúf innan um allar lopapeysurnar. 

Aldís á Álfaborginni

Silla á Álfaborginni

Sindri Þór og Skírnir Garpur í útilegu

Sólsetrið á Borgarfirði eftir tónleikana

Sindri að taka viðtal við Sigtrygg eftir tónleikana

 Vika 30:

Hundapössun. Við Sindri upplifðum mjög villta verslunarmannahelgi þetta árið þegar við tókum að okkur að vera í Hveragerði og passa þá Hrekk og Móra á meðan tengdó skelltu sér til Danmerkur.

Hótel Örk. Þar sem Arna og pabbi höfðu stungið að okkur gjafabréfi sem þau höfðu unnið fyrir með skemmtun fyrir eldri borgara á Hótel Örk var tilvalið að nýta það á meðan á hundapössun stóð. Við fórum því þangað eitt kvöldið í þriggja rétta kvöldverð og þurftum einungis að borga fyrir gosið okkar. Það var verulega huggulegt, og alveg nýtt fyrir mér þar sem ég hef ekki borðað þar áður.

Lifið heil! Ágúst er á leiðinni!

Vikur 23-26 2011: Júní uppgjör

Þar sem það eru ár og aldir síðan ég skrifaði eitthvað hér inn síðast hef ég ákveðið að gera upp sumarið með því að blogga um einn mánuð í einu. Vonandi gerist það hratt og örugglega svo ég nái því að blogga um hverja og eina viku september mánaðar og það sem eftir er til áramóta.

1. Vigtin. Ég hékk voðalega mikið í sama farinu í sumar og lítið að frétta með þetta en vikurnar fóru svona:
23. vika: +300 gr. frá vikunni á undan
24. vika: -300 gr. frá vikunni á undan
25. vika: 0 gr. stóð í stað
26. vika: -200 gr. frá vikunni á undan.

Þetta þýðir það að eftir allan júní mánuð hafði ég lést um 200 gr. :) hahahaha! En það sem gladdi mig á þessum tímapunkti í sumar var að ég fann gamla matardagbók sem ég hafði skrifað í alveg frá 2008. Þar inni voru þyngdartölur fyrir hverja viku, eða mánuð eða eftir hentisemi og þar sá ég í júní að ég hafði lést um 7,1 kg frá því um haustið 2008, en ég hef reyndar aldrei verið þyngri heldur en þá. Þetta gladdi óneitanlega sálina mjög í þessu sífellda hundrað gramma hjakki.

2. Sparnaður. Ég lagði 5000 kr. sómasamlega inn á ferðareikninginn

3. Diskar mánaðarins! FYRSTA FALLIÐ! Já, þetta reyndist vera fyrsta áramótaheitið til þess að hverfa inn í svartholið í ár.... finnst samt ótrúlegt að það sé að gerast fyrst eftir rúma 5 mánuði af árinu.... En þarna gafst ég upp og viðurkenndi að ég væri búin að skíta upp á bak varðandi þetta! Finnst ég hálfpartinn laus úr viðjum með að sleppa þessu :)

4. Nýtt mánaðarins!!!
23. Vika:
Nýjungarnar þessa vikunna tengdust mikið tónlist, eða þ.e.a.s. tvær af þremur. Ég byrjaði á því að mæta á NASA á miðvikudeginum á Steelheart tónleika sem ég hefði alls ekki fyrir mitt litla líf viljað missa af!!! Ég var búin að tjúna mig vel upp af "She's gone" og Rockstar smellum..... ég bjóst svosem alveg eins við annari Whitesnake upplifun þar sem lögin höfðu öll verið lækkuð og söngvarinn við það að gefa upp öndina eftir hvert lag en svo var aldeilis ekki! Þvílíkt form sem maðurinn er í, það er eiginlega bara bull!!! Hvert lagið á fætur öðru endaði með gífurlegum raddæfingum og þrátt fyrir það vantaði EKKERT upp á síðasta lag kvöldsins, She's gone! Geðveikir tónleikar í alla staði!

Daginn eftir fór ég síðan alveg óvænt á aðra tónleika. Mig langaði en hafði ekki haft efni á að kaupa mig inn. Ég var á leiðinni á Pole fit æfingu í Egilshöll og var kominn upp á Ártúnshöfða þegar pabbi hringir og spyr mig hvort ég hafi áhuga á að þiggja miða á Eagles. Þá tók ég U-beygju. Eðlilega er ekki hægt að bera þessa tónleika saman við miðvikudagstónleikana þar sem Steelheart og Eagles eru ekki alveg í sama flokki. Hér var um ansi mikið stærri tónleika að ræða í höllinni og ég sá aðeins framan í hljómsveitarmeðlimi á tjöldunum sem héngu uppi í salnum, annars virkuðu þeir meira eins og legokallar með hljóðfæri að sjá. Eagles eru þéttir, þeir eru akkúrat og það er enginn svikinn um neitt. Hins vegar koma þeir heldur ekki á óvart.... á tímabili fannst mér eins og ég hefði sett best of diskinn minn í tækið... ég fann lítið fyrir því að tónleikarnir væru live.

Síðast en alls ekki síst keypti ég mér þennan fallega te kassa í Söstrene Grene :)

 24. vika:

Í 24.viku ákvað ég að nota happdrættisvinninginn sem ég fékk í happdrætti SSF og kaupa mér reiðhjól en ég hef ekki átt svoleiðis síðan í grunnskóla. Fyrir valinu varð Mongoose götuhjól sem ég keypti í GÁP. Ég hef því miður ekki ennþá tekið mynd af mér með því eða á því þannig að það verður að bíða betri tíma :)

25. vika:

Þessi vika innihélt 4 mjög ólíkar nýjungar. Í fyrsta lagi þá ákváðum við Sindri að prófa að fara í Kost og versla þar. Upplifunin var svipuð því að fara út í búð að verlsa í útlöndum, við vorum aðallega í því að benda hvort öðru á áhugaverðar vörur og áhugaverðar STÆRÐIR af vörum. Til dæmis þætti mér gaman að vita á hversu mörgum dögum væri mögulegt að torga snakkpokunum sem eru seldir þarna??? Áhugavert mjög.

Við Sindri kíktum líka á bílskúrsmarkað í Hveragerði þar sem Sara systir hans var meðal annars að selja föt. Þar keypti ég mér mjög fallegt heklað armband og Sindri gaf mér kamb sem gerður var af sömu konu. Meðfylgjandi var miði sem á stóð Dista - handgert skart sími: 865-9112.

Síðasta nýjungin þessa vikuna var síðan sú að ég sýndi í fyrsta skipti einhverjum öðrum en æfingafélög mínum pole fitness atriði. Það var uppskeruhátíð hjá okkur upp í Heilsuakademíu og þar tók ég þátt í hópatriði.

26. vika:
Það voru þrjár nýjungar í þessari viku. Eins og ég sagði áður hef ég oft skrifað matardagbók, það er ráð sem manni er gefið til að halda aftur að manni. Virkar rosa vel fyrst þegar þú sérð hvað þú ert að borða en með tímanum hefur það lítil áhrif á þig að lesa aftur og aftur yfir eigin mistök. Í þessari viku skrifaði ég hins vegar í fyrsta skipti matardagbók fyrir einhvern annan heldur en sjálfa mig þar sem Sólveig Pole fit þjálfarinn minn bauðst til þess að fara yfir dagbókina mína... og það er töluvert annað en að lesa yfir þetta sjálfur! :)

Ég keypti mér líka rosalega gott ilmvatn:

 

 Síðast en alls ekki síst þá kíkti ég á útsölu í KronKron þar sem mig hefur lengi langað í Kron by Kronkron skó og hafði sett það á verðlaunalistann minn að ég fengi að kaupa mér slíka þegar ég væri komin niður í vissa þyngd. Ég var þó ekki komin í hana en sá leik á borði að kaupa skóna ódýrari en annars, sem ég gerði og pakkaði þeim mjög heiðarlega strax niður í kassa aftur og setti þá inn í fataskáp þar sem þeir skyldu bíða eftir mér þangað til ég ætti þá skilið! Hins vegar var annað skópar þarna líka sem mig langaði voðalega í og Sindri sem var svo óheppinn að bjóðast til að fara með mér bauðst til þess að gefa mér þá í afmælisgjöf jafnvel þótt afmælið mitt væri ekki fyrr en í september. Ég lét auðvitað ekki segja mér það tvisvar og eignaðist þessa fallegu skó:

Held að þetta sé orðið meira en nóg í bili - tölvan mín nær ekki að kæla sig niður vegna of stórra verkefna við gerð þessarar færslu! :)

Júlí færslan er svo næst!